- 302 -

1375. Aug. 9. Liegnitz.

Herzog Ruprecht mit seinen Brüdern verkauft der Stadt 100 Mark Erbgeschoss für 1000 Mark.

Wir Ruprecht, Wenczlaw, Bonczlaw vnd Heynrich, von gotis genaden herczogen yn Slezien vnd herren czu Legnicz gebrudir, bekennen vffenlich mit desem briue allen, die en sehn adir horen lesen, daz wir mit gutem rate vnser eldisten getrouwen von vnsir selbis nucz vnd notdurft wegen, geheysen vnd geboten haben, vnsern getrouwen lieben borgermeystir vnd ratmannen vnser stath Legnicz, daz see vorkoufen sullen vnd mogen vnsers rechten erbgeschosses, daz wir ierlich haben vf der vorgenanten vnser stath Legnicz hundirt mark czu ierlichem czinse czu rechtem vnd nemlichen wedirkoufe vmbe tousund mark Pragisscher grosschen Polnisscher czal, vnschedelich vns vnd vnsen nochkomlingen, erbherren czu Legnicz an vnser losunge an den selben hundirt marken ierliches czinses, vmbe alzo vil geldes moncze vnd werunge, alze vor steet geschreben; vnd qwyten see der selben hundirt mark vnses geschosses ierlich von vnsers vnd von vnser nochkomlinge wegen erbherren czu Legnicz, alzo lange, alze wir see nicht wedir abkoufen, vnd czu vns gelosen vmbe alzevil geldis, alze vor steet geschreben. Dez czu orkunde haben wir en desen brieff geheysen geben vorsegelt mit vnseme grosten gemeynen anhangenden yngesegil. Daz ist gescheen czu Legnicz noch Cristi geburd vnsers lieben herren tousund vnd dryhundirt jare ym vomf vnd sebenczegesten jare an sanct Laurencii obande.

O. d. St. L. No. 146. Das Siegel an Pergamentstreifen. — Bitschens Privüegb. f. CXXXII.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866